ព័ត៌មានក្នុងខេត្ត

នៅព្រឹកថ្ងៃអង្គារ ទី១៤ ខែកក្កដា ឆ្នាំ២០២៦ នេះ​ ឯកឧត្ដម លាង មុន្នីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកដំណាក់ចង្អើរ និងក្រុងកែប​ លោកជំទាវ​ សាយ​ ចាន់ណាក់​ សមាជិក​ក្រុមការងារ​រាជរដ្ឋាភិបាល​ចុះមូលដ្ឋានខេត្ត​ និងលោក ឆាង ឆៃ អភិបាលនៃគណៈអភិបាលស្រុក​ បានដឹកនាំក្រុមការងារ ចុះសួរសុខទុក្ខ និងនាំយកអំណោយ ទៅចែកជូនប្រជាពលរដ្ឋរងគ្រោះដោយសារខ្យល់កន្ត្រាក់ ប៉ើងដំបូលផ្ទះ ចំនួន ០៨ គ្រួសារ ដែលរស់នៅឃុំពងទឹក និងឃុំអង្កោល ស្រុកដំណាក់ចង្អើរ ខេត្តកែប៕

ឯកឧត្តម លាង មុន្នីរិទ្ធ ប្រធានក្រុមការងាររាជរដ្ឋាភិបាលចុះមូលដ្ឋានក្រុងកែប និងស្រុកដំណាក់ចង្អើរ រួមជាមួយលោកជំទាវ សាយ ចាន់ណាក់ និងក្រុមការងារថ្នាក់ខេត្ត បានចុះពិនិត្យស្ថានភាពទំនប់ ប្រឡាយរំដោះទឹក និងជីវភាពប្រជាពលរដ្ឋនៅតាមមូលដ្ឋាន ព្រមទាំងនាំយកស័ង្កសី តង់ និងសម្ភារចាំបាច់ ប្រគល់ជូនគ្រួសារដែលរងផលប៉ះពាល់ដោយសារជំនន់ទឹកភ្លៀង។ កែប, ថ្ងៃទី១៤ ខែកក្កដា ឆ្នាំ២០២៦

រសៀល ថ្ងៃសុក្រ ១១រោច ខែបឋមាសាឍឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែកក្កដា ឆ្នាំ២០២៦ ខេត្តកែប៖ លោក អ៊ឹម បញ្ញារិទ្ធិអភិបាលរងខេត្ត តំណាងដ៏ខ្ពង់ខ្ពស់ ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្ត អញ្ជើញជាអធិបតីភាពដឹកនាំកិច្ចប្រជុំការត្រួតពិនិត្យគម្រោងចំណូល សម្រាប់ឆ្នាំ២០២៧ នៅសាលប្រជុំតូចសាលាខេត្ត។

រសៀល ថ្ងៃពុធ ៩រោច ខែបឋមាសាឍ ឆ្នាំមមី អដ្ឋស័ក ព.ស២៥៧០ ត្រូវនឹង ថ្ងៃទី៨ ខែកក្កដា ឆ្នាំ២០២៦ ភ្នំពេញ÷ ឯកឧត្ដមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប អញ្ជើញចូលរួមគោរពវិញ្ញាណក្ខន្ធសពឧបាសិកា នេត សុគន្ធ ដែលត្រូវជាបងស្រីបង្កើតរបស់ ឯកឧត្ដមសន្តិបណ្ឌិត នេត សាវឿន ឧបនាយករដ្ឋមន្ត្រី ៕

ព្រឹក ថ្ងៃពុធ ៩រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៨ ខែកក្កដា ឆ្នាំ២០២៦ ខេត្តកែប៖ លោក អុឹម បញ្ញារិទ្ធិ អភិបាលរងខេត្ត អញ្ជើញចូលរួម កិច្ចប្រជុំបើកវគ្គសវនកម្មលើការអនុលោមតាមច្បាប់ និងបទប្បញ្ញត្តិនៅខេត្តកែប សម្រាប់ការិយបរិច្ឆេទ២០២៥ និងឆ្នាំពាក់ព័ន្ធ ក្រោមអធិបតីភាព ឯកឧត្តម ឡុង អាទិច្ចបូរា អគ្គលេខាធិការ នៃអាជ្ញាធរសវនកម្មជាតិ តាមរយៈប្រព័ន្ធ (ZOOM) នៅសាលប្រជុំតូចសាលាខេត្តកែប៕

ខេត្តកែប៖ លោកជំទាវ ដួង កែវ ចិន្តា សមាជិកាក្រុមប្រឹក្សាខេត្តកែប បានជំរុញឱ្យសមាជិកសមាគមនារីគ្រប់លំដាប់ថ្នាក់ បន្តផ្តោតការយកចិត្តទុកដាក់លើការលុបបំបាត់អំពើហិង្សាក្នុងគ្រួសារ ការកាត់បន្ថយអត្រាមរណភាពមាតា និងទារក ព្រមទាំងការបង្ការ និងទប់ស្កាត់ការឆបោកតាមប្រព័ន្ធអនឡាញ ដើម្បីរួមចំណែកលើកកម្ពស់សុខុមាលភាពស្ត្រី និងកុមារ ការលើកឡើងនេះ ធ្វើឡើងក្នុងកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅការងារឆមាសទី២ ឆ្នាំ២០២៦ របស់សមាគមនារីកម្ពុជាដើម្បីសន្តិភាព និងអភិវឌ្ឍន៍ ខេត្តកែប នាព្រឹកថ្ងៃទី៧ ខែកក្កដា ឆ្នាំ២០២៦ ក្រោមអធិបតីភាពលោកជំទាវ ដួង កែវ ចិន្តា សមាជិកាក្រុមប្រឹក្សាខេត្តកែប និងលោកស្រី អ៊ូ សុគន្ធី ប្រធានមន្ទីរកិច្ចការនារី ខេត្តកែប ព្រមទាំងមានការចូលរួមពីថ្នាក់ដឹកនាំ និងសមាជិកសមាគមគ្រប់លំដាប់ថ្នាក់ នៅសាលប្រជុំមន្ទីរកិច្ចការនារីខេត្តកែប ។

រសៀល ថ្ងៃព្រហស្បតិ៍ ៣រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែកក្កដា ឆ្នាំ២០២៦ ខេត្តកែប: លោក ញ៉ុន សិទ្ធ អភិបាលរង នៃគណៈអភិបាលខេត្ត បានអញ្ជើញដឹកនាំកិច្ចប្រជុំការងារពាក់ព័ន្ធរបាយការណ៍នៃការអនុវត្តផែនការ សកម្មភាពឆមាសទី១ឆ្នាំ២០២៦ របស់សមាគម អង្គការមិនមែនរដ្ឋាភិបាល និងសហគមន៍នានា ដែលកំពុង ធ្វើសកម្មភាពក្នុងភូមិសាស្ត្រខេត្តកែប នៅសាលប្រជុំតូចសាលាខេត្ត។

ព្រឹក ថ្ងៃព្រហស្បតិ៍ ៣រោច ខែបឋមាសាឍឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែកក្កដា ឆ្នាំ២០២៦ ខេត្តកែប៖ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងកែប អញ្ជើញជាអធិបតីភាព ដឹកនាំកិច្ចប្រជុំបូកសរុបលទ្ធផលការងារប្រចាំឆមាសលើកទី១ ឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានក្រុងកែប និងលើកទិសដៅអនុវត្តបន្ត ឆមាសបន្ទាប់ នៅសាលប្រជុំសាលាក្រុងកែប។

ខេត្តកែប៖ នៅរសៀលថ្ងៃទី២៩ ខែមិថុនា ឆ្នាំ២០២៦ លោក សាន ប៊ុនធឿន អភិបាលរងក្រុងកែប តំណាងលោក ឃន វុទ្ធី អភិបាលក្រុងកែប បានដឹកនាំក្រុមការងារគណៈបញ្ជាការឯកភាពក្រុងកែប ចុះពិនិត្យ សម្របសម្រួល និងរៀបចំសណ្តាប់ធ្នាប់ហេដ្ឋារចនាសម្ព័ន្ធនៅតំបន់ចំហៀងផ្សារដំណាក់ចង្អើរ ដើម្បីរៀបចំកែលម្អប្រព័ន្ធលូបង្ហូរទឹកឡើងវិញ ឱ្យមានប្រសិទ្ធភាព និងសមស្របទៅតាមតម្រូវការជាក់ស្តែង។ ការចុះអនុវត្តការងារនេះ មានគោលបំណងដោះស្រាយបញ្ហាការកកស្ទះលំហូរទឹក កាត់បន្ថយហានិភ័យនៃការជន់លិចក្នុងរដូវវស្សា ព្រមទាំងធានាបាននូវការបង្ហូរទឹកប្រកបដោយប្រសិទ្ធភាព។ ទន្ទឹមនឹងនេះ ក៏ជាការលើកកម្ពស់សោភ័ណភាព បរិស្ថាន និងសណ្តាប់ធ្នាប់សាធារណៈនៅក្នុងក្រុងកែប ឱ្យកាន់តែមានភាពស្អាត របៀបរៀបរយ និងទាក់ទាញផងដែរ។

ខេត្តកែប៖ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ និងប្រសាសន៍ណែនាំផ្ទាល់ពីលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប នៅព្រឹកថ្ងៃទី ២៩ ខែមិថុនា ឆ្នាំ២០២៦ កម្លាំងការិយាល័យគ្រប់គ្រងជនបរទេស និងការិយាល័យស៊ើបអង្កេត និងអនុវត្តនីតិវិធី សហការជាមួយកម្លាំងអធិការដ្ឋាននគរបាលក្រុងកែប បានបន្តចុះត្រួតពិនិត្យវត្តមានជនបរទេសស្នាក់នៅរយៈវែង-ខ្លី និងបានពិនិត្យផ្ទៀងផ្ទាត់លើប្រព័ន្ធគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជា(FPCS) នៅក្រុងកែប ចំនួន១១គោលដៅ មានជនបរទេស ចំនួន១៧នាក់ ស្រី៤នាក់ មានលិខិតឆ្លងដែនត្រឹមត្រូវ ៕

កែប៖ សំណួរ និងសំណូមពរចំនួន ១០ករណី ដែលលើកឡើងដោយប្រជាពលរដ្ឋក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុកដំណាក់ចង្អើរ ឆ្នាំទី៣ អាណត្តិទី៤ ត្រូវបានអង្គវេទិកាធ្វើការបកស្រាយ សម្របសម្រួល និងដោះស្រាយបានភ្លាមៗចំនួន ៨ករណី ខណៈ ២ករណីទៀត ត្រូវបានកត់ត្រា និងបញ្ជូនបន្តទៅថ្នាក់ខេត្ត ដើម្បីពិនិត្យ និងស្វែងរកដំណោះស្រាយបន្ត។

ស្ពានបេតុង ប្រវែង ៦០ម៉ែត្រ និងផ្លូវបេតុងសងខាងក្បាលស្ពាន ប្រវែង ៣០០ម៉ែត្រ នៅខេត្តកំពត ត្រូវបានបើកការដ្ឋានស្ថាបនា ដើម្បីសម្រួលដល់ការធ្វើដំណើររបស់ប្រជាពលរដ្ឋ ឯកឧត្តម សាន វិសាល រដ្ឋលេខាធិការក្រសួងអភិវឌ្ឍន៍ជនបទ និងឯកឧត្តម ម៉ៅ ធនិន អភិបាលខេត្តកំពត បានអញ្ជើញជាអធិបតីក្នុងពិធីបើកការដ្ឋានស្ថាបនាស្ពានបេតុងប្រវែង ៦០ម៉ែត្រ និងផ្លូវបេតុងសងខាងក្បាលស្ពានប្រវែង ៣០០ម៉ែត្រ នៅភូមិកន្លង់ ឃុំស្តេចគង់ខាងជើង តភ្ជាប់ទៅភូមិចម្លងជ្រៃ ឃុំទូកមាសខាងលិច ស្រុកបន្ទាយមាស ខេត្តកំពត ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ និងលើកកម្ពស់សេដ្ឋកិច្ចមូលដ្ឋាន។ ខេត្តកំពត | ២៥ មិថុនា ២០២៦ ក្រុមការងារ​រាជរដ្ឋាភិបាលកម្ពុជា