ព័ត៌មានក្នុងខេត្ត

ឯកឧត្តមបណ្ឌិត សោម ពិសិដ្ឋ អភិបាលខេត្តកែបមានប្រសាសន៍ លើកឡើងបែបនេះ​ ក្នុងពិធីអបអរសាទរ រុក្ខទិវា ០៩ កក្កដា ឆ្នាំ២០២៦ នាព្រឹកថ្ងៃទី២០ ខែសីហា ឆ្នាំ២០២៦ ស្ថិតនៅក្នុងវិទ្យាល័យ ប៊ុនរ៉ានី ហ៊ុន សែន ចរិយាវង្ស ដែលមានការអញ្ជើញចូលរួមជាអធិបតីសំណាក់ ឯកឧត្តម អ៊ុក ថា ប្រធានក្រុមប្រឹក្សាខេត្ត និងអមដំណើរដោយលោក​ លោកស្រី​ អភិបាលរងខេត្ត កងកម្លាំង​ទាំងបី​ អាជ្ញាធរក្រុង ស្រុក លោក ប្រធានមន្ទីរ-អង្គភាពជុំវិញខេត្ត លោកគ្រូ អ្នកគ្រូ យុវជន ព្រមទាំងសិស្សានុសិស្សសរុប៤១០នាក់។ មានប្រសាសន៍សំណេះសំណាលនា​ឱកាស​នោះ​ ឯកឧត្តមបណ្ឌិត សោម ពិសិដ្ឋ លើកឡើងថា ការប្រារព្ធ រុក្ខទិវា ០៩ កក្កដា ដែលមានការដាំដើមឈើជានិមិត្តរូប គឺជាការបំផុសចលនាដល់យុវជនជំនាន់ក្រោយឲ្យយល់ដឹងពីសារសំខាន់នៃព្រៃឈើចំពោះជីវិតមនុស្សសត្វ និងចេះស្រលាញ់ និងថែរក្សាព្រៃឈើ ព្រោះព្រៃឈេីអាចរក្សាអាកាសធាតុអោយមានលំនឹងនៃប្រក្រតីភាពបរិស្ថានសម្រាប់ជីវិតលើផែនដី និងវិស័យកសិកម្ម។ ដូចនេះយើងទាំងអស់គ្នាត្រូវតែគិតគូរដោយស្មារតីភ្ញាក់រលឹកខ្ពស់ចូលរួមថែរក្សាការពារអភិរក្សព្រៃ និងទីជម្រកនៃជីវចម្រុះក្នុងខេត្តរបស់យើងអោយមាននិរន្តរភាពដោយតម្រូវចូលរួមដាំដើមឈើម្នាក់១ដើម ក្នុងមួយជីវិត។