អាជ្ញាធរក្រុងកែប ចុះជួបសួរសុខទុក្ខប្រជាពលរដ្ឋ ៦៨គ្រួសារ នៅកោះពោធិ៍ ព្រមទាំងនាំយកសម្ភារប្រើប្រាស់មួយចំនួន និងថ្នាំសង្កូវទៅ ជាមួយ
ខេត្តកែប៖ លោក ឃន វុទ្ធី អភិបាលក្រុងកែប បានដឹកនាំមន្ត្រីរាជការសាលាក្រុង ចៅសង្កាត់កែប ក្រុមគ្រូពេទ្យមណ្ឌលសុខភាពព្រៃធំ និងសប្បុរសជនមកពីរាជធានីភ្នំពេញ ចុះជួបសួរសុខទុក្ខប្រជាពលរដ្ឋចំនួន ៦៨គ្រួសារ ដែលរស់នៅលើកោះពោធិ៍ ស្ថិតក្នុងភូមិកែប សង្កាត់កែប ក្រុងកែប ខេត្តកែប នាថ្ងៃទី៦ ខែវិច្ឆិកា ឆ្នាំ២០២៦។ ជាមួយគ្នានេះ ក្រុមការងារ និងសប្បុរសជនក៏បាននាំយកគ្រឿងឧបភោគបរិភោគ និងសម្ភារប្រើប្រាស់ ចែកជូនប្រជាពលរដ្ឋ និងឧបត្ថម្ភដល់កងកម្លាំងឈរជើងតាមបណ្តាកោះ។ ក្នុងឱកាសនោះ ក្រុមការងារបានណែនាំប្រជាពលរដ្ឋអំពីការពិនិត្យបញ្ជីឈ្មោះបោះឆ្នោត និងការធ្វើជីវមាត្រ ព្រមទាំងផ្សព្វផ្សាយគោលនយោបាយភូមិ-ឃុំ-សង្កាត់ មានសុវត្ថិភាពផងដែរ។ សកម្មភាពនេះជាការចូលរួមយកចិត្តទុកដាក់លើសុខុមាលភាព និងជីវភាពរស់នៅរបស់ប្រជាពលរដ្ឋនៅតំបន់កោះ ព្រមទាំងជួយសម្រួលដល់ការទទួលបានសេវាសុខាភិបាល និងការគាំទ្រផ្នែកសង្គម ដោយមិនទុកឱ្យប្រជាពលរដ្ឋនៅតំបន់ដាច់ស្រយាលត្រូវប្រឈមការលំបាកដោយឯកឯងឡើយ៕ អត្ថបទ៖ លោក ង៉ុង សាន់ មន្ទីរព័ត៌មានខេត្តកែប
